หลังจากตี่สร้างฐานพระรูปแล้วเสร็จ วันตี่ ๓๑ มีนาคม ๒๕๐๗ ก็ได้ฤกษ์งามยามดีตี่จะอัญเชิญพระรูปพญามังรายมหาราช ปฐมกษัตริย์แห่งอานาจักรล้านนา ตี่หล่อด้วยสัมฤทธิ์ขนาดความสูงหนึ่งเท่าครึ่งของพระองค์จริง มาประดิษฐานยังอนุสาวรีย์พญามังรายมหาราช ณ.ห้าแยกใจ๋กลางเวียงเจียงฮาย สถานที่ตี่ทุกผู้ทุกคนผ่านไปผ่านมาก็ต้องยกมือไหว้สาขอพรทุกครั้งไป และด้วยความฮ่วมแฮงฮ่วมใจ๋ของปี่น้องประชาชนจาวเจียงฮายในสมัยนั้น ใจ้งบประมาณไปทั้งหมดทั้งสิ้น ๘ หมื่นบาท ฮ่วมกั๋นสร้างไว้เพื่อหื้อหมู่เฮาจาวเจียงฮายรุ่นต่อๆมา ได้น้อมรำลึกถึงพระมหากรุณาธิคุณ และยังได้สักการะบูชากราบไหว้ขอพรต่อองค์ป่อพญาฯ มาจ๋นถึงทุกวันนี้
"ปกรณ์ เล็กฮอน" คือผู้บรรจงสรรค์สร้าง ปั้นพระรูปตี่มีความสูงถึงหนึ่งเท่าครึ่ง แล้วหล่อด้วยทองสัมฤทธิ์อันมีความวิจิตรงดงาม สง่า น่าเกรงขาม แสดงหื้อหันถึงพระบารมีแผ่ไพศาลปกบ้านป้องเมืองเจียงฮายมาแล้วถึง ๗๕๐ ปี๋
จากเพจ เจียงฮายบ้านเฮา
